Астанада кейбір көшелерде көлік қозғалысы уақытша шектелді

Астанада 28 сәуірде Бірлік күнін мерекелеу аясында спортсүйер қауым үшін ең ірі жарыстардың бірі – «Бірлік жүрісі» өтеді. Осыған байланысты кейбір көшелерде көлік қозғалысына уақытша шектеу енгізіледі, деп хабарлады Elorda.info, қала әкімдігінің ресми сайтына сілтеме жасап.

Жарысты Астана қаласының триатлон федерациясының қолдауымен Қазақстан халқы ассамблеясы ұйымдастырады. Астана қаласының Триатлон федерациясының ұйымдастыру комитеті елорда тұрғындары мен қонақтарын жарыс өтетін орындардағы жолдардың кейбір учаскелерінде қозғалыстың ішінара жабылғаны туралы мәлімдеді.

 Осыған байланысты ЭКСПО маңындағы Түркістан көшесінің солтүстік бағытындағы учаскеде қозғалыс 27 сәуір сағат 15:00-ден 28 сәуір сағат 15:00-ге дейін жабылады (бастапқы/аяқтау аркасын монтаждау/бөлшектеу).

Түркістан көшесі ЭКСПО ғимаратынан Достық көшесіне дейін, Достық көшесі Түркістан көшесінен Ақмешіт көшесіне дейін, Ақмешіт көшесі Достық көшесінен Түркістан көшесіне дейін оңтүстік бағытта қозғалыс 28 сәуір сағат 06:50-ден 10:00-ге дейін жабылады,- деп жазды дереккөз. 

 Бұл шектеулер жарысқа қатысушылардың қозғалыс уақытын ұтымды бөлуді ескере отырып енгізілді.